EAJ-PNVko Luke Uribe-Etxebarria senatariak Espainiako Gobernuari eskatu dio Irango eta Ekialde Hurbileko gerraren ondorio ekonomiko negatiboei erantzuteko "aurrea hartzeko eta etorkizuneko egoerak aurreikusteko gai izan daitezela, eta baita ere malgutasun eta bizkortasun nahikoa”. Senatuan gaur arratsaldean egin den kontrol saioan, senatari abertzaleak Carlos Cuerpo Ekonomia ministroari dei egin dio "suziri-luma" izeneko efektua saihes dezaten; izan ere, horrek, egoera honi aplikatuta, “esan nahiko luke familiek eta enpresek ondorio ekonomiko negatiboak berehala nabaritzea eta, hala ere, Espainiako Gobernuak astiro erantzutea, gertaerek gainditu dutenean".
Uribe-Etxebarriak gerra-ekintzak laster amaitzeko desioa azpimarratu du, baina, halere, eragin ekonomikoa denboran luzatuko dela deitoratu du, Ekialde Hurbilak nazioarteko ekonomian duen garrantzia dela eta. "Herritarrak, enpresak eta merkatuak oso urduri eta beldurrez daude. Dagoeneko nabaritzen ari dira gatazka belikoaren ondorio ekonomiko negatiboak erregaien, gasaren eta abarren prezioan. Eta egoera larriagotu egin daiteke gatazka luzatzen bada ", iragarri du.
Ministroen Kontseiluan ostiralean onartuko dituztela jakinarazitako neurrien ildo nagusiak zehazteko eskatu ostean, Imanol Pradales lehendakariak Pedro Sanchez presidenteari igorritako proposamenak aldarrikatu ditu Uribe-Etxebarriak, baita Eusko Jaurlaritzak gaur goizean hartutako neurri sorta ere, 1.047 milioi eurorekin, Euskadiko ekonomian gatazkak izango duen eraginaren aurrean ‘ezkutu industriala’ osatzeko. "Jarduerak pertsonak eta enplegua babestera, ETEei finantza-laguntza ematera eta autonomia energetikoa indartzera bideratuta daude”. Azpimarratu du, baita ere, EAJ-PNVren proposamenen helburua pertsona eta familia ahulenak eta klase ertain eta langileak babestea dela; garraioaren eta nekazaritzaren sektoreei arreta ematea, eta autonomoei eta industriari laguntzea, bereziki, Euskadin ezarpen handia duen elektrointentsiboari, eta kontuan hartzea eskatu du.
