Aitor Esteban Euskal Taldeko bozeramaileak EAJ-PNVren politika egiteko modua aldarrikatu du, eta EAJ-PNVk "populismoari, autoritarismoari, marketin politikoari eta elkarrizketarik ezari aurre egiteko" duen konpromisoa berretsi du.
"Garai nahasiak bizi ditugu; alde batetik, ultraeskuina zuritzen eta normalizatzen dela ikusten dugu, Autonomia Erkidegoetako Gobernuetan ere sartuz, eta, bestetik, politika egiteko modu bat ikusten dugu, populista, marketinari begira, erregate laburrekoa eta demagogikoa, non erdi egiak edo, zuzenean, gezurra edo zehaztasun ezak lehenesten diren, Feijóok orain dioen bezala", deitoratu du Bizkaiko hautagaiak Gasteizen egindako ekitaldi batean, Mikel Legardarekin batera. "Une honetan, alderdi politikoek inposizioa planteatzen dute elkarrizketaren ordez; bertan, liskarra da nagusi. Eta hori benetako hondamendia da ", adierazi du.
Errealitate horren aurrean, bozeramaile jeltzaleak esan du egon badagoela "politika egiteko beste modu bat: EAJk ordezkatzen duena". "Giza eskubideen defentsan oinarritutako politika, sendoa eta herritarrei gezurrik egin gabe, elkarrizketa eta negoziazioa elementu nagusitzat hartuta", esan du. "Horrela izan da beti, eta hala izaten jarraituko du", esan du, EAJ-PNV "beti historiaren alde egokian" egon dela gogorarazi ondoren.
Hain zuzen ere, "Espainiako Estatuaren demokratizazioan sakondu ahal izateko", Estebanek egiteke dauden erreforma batzuk aipatu ditu, hala nola, Euskadi nazio gisa aitortzeari buruzkoa, Sekretu Ofizialen Lege frankista eguneratzeari buruzkoa, mozal legea bezala ezagutzen dena, edo Erregearen bortxaezintasuna, besteak beste. "Erreforma horiei aurre ez egiteak gure eskubideak ukatzen dituztenei laguntzea dakar, populismoari, autoritarismoari eta, jakina, ezegonkortasunari eta sinesgarritasun demokratikorik ezari laguntzea", adierazi du.
Mikel Legardak, bere aldetik, ohartarazi duenez "datorren igandean asko dugu jokoan". Euskal hiriburuaren bihotzetik, Andre Maria Zuriaren plazan, hautagai jeltzaleak ziurtatu duenez, "inoiz ez da izan egunero eragiten diguten hainbeste erronka, eta erabakitasunez egin behar diegu aurre, Araba eta Euskadi egoerarik onenetan jarriz, ahots propioarekin, guk egiten ez badugu, ez baitu beste inork egingo". Zeregin bat izango da, "gaur egun gizartea zatitzen saiatzen ari diren populismoei aurre egitea" aipatu du Arabako hautagai jeltzaleak.
Hala, diputatuak ohartarazi du zenbait indar politikok gaitasuna dutela "Espainiako eta Euskadiko Gobernuaren alternatiba gisa aurkezten direnak baldintzatzeko". "Ekainaren 23an demokrazia bozkatu behar da, eta haren babesle izan dena, zeinu bateko edo besteko populismoekin kutsatu gabe", aldarrikatu du Legardak; "demokrazia frankismoaren edo martxoaren 3ko biktimentzako memoria, justizia eta erreparazioa delako, demokrazia zuzenbide-estatua eta legezkotasun-printzipioa delako 40 urte bete gabe daramatzan Estatutuarentzat, demokrazia pluralismoa delako eta demokrazia euskal herritarren etorkizuna erabakitzeko eskubidea delako, Trebiñuko herritarrek bezala", gaineratu du.
