Agiria 489 eurodiputatuk babestu dute, ganberako gehiengo absolutuak, eta bere bidez ezartzen da babes hori izango dela Batasunean demokraziaren eta Zuzenbide estatuaren inguruan hitzemango den hitzarmenaren oinarrizko edukietako bat. Era berean aldarrikatzen du gainbegiratze mekanismoa ezartzea, hau da, Urkullu lehendakariak proposatutako Argitasun Zuzentarauak iradokitzen duena moduko arbitraje mekanismoa. Era berean, aurka egiten dio hauteskundeei buruzko legeria bidez aniztasun horren adierazpen instituzionala ezabatu ahal izateari.
Izaskun Bilbao Barandicak atzo gaueko azken orduan Joseph Nagy Hungariako diputatuak koordinatu duen txosten hau aurkeztu zenean azpimarratu zuenez, bere edukiak berebizikoak izango dira “nazio-gutxiengo bateko kide izateagatik diskriminatuta dauden milioika europarren eskubideen defentsan”, eta ekarpen argigarri jo du estatuen nazionalismoen aurrean. “Estatuen nazionalismoek Europa integratzeko hainbat proposamen eragozten dituzte. Baina era berean oztopatzen dute errealitate nazional tradizionalak ukatuaz, beren kideen oinarrizko eskubideen kontra eginaz,hauteskunde legeria baztertzaileen bidez haien ordezkaritza instituzionala eragotziaz eta lurralde arazo handiak eraginaz. Ofizialki ukatu arren, erabat kaltetzen dute gure Batasuna”.
“Batasuneko erakundeek, gaineratu zuen atzo eurodiputatu jeltzaleak, pribatuan aitortzen dute `denek ezagutzen duten sekretu hau´, eta tresnak behar dituzte”. Horregatik azpimarratu zuen EAJk ere babestuko duela “gutxiengoak babesteko legeria loteslea”. “Arazoak gaiztotzen direnean ere, bitartekaritza egin ahal izateko. Egiaztatu dugu jada nazionalismo baztertzaile batek, zuzenbidea bere nahierara erabilita, hiritar baketsuen kontrako jarduera polizialak justifikatzen dituela edo zigor arazo bat arazo politiko bihur dezakeela eta herri kargudunak beren jardun politikoagatik espetxeratzera irits daitekeela. Eta horrek denak ia ezinezko izan beharko luke gure Batasunean”.
