2018ko Zinemaldian Donostiara etorri diren artisten kopurua ez da edozein huskeria edo azaleko zerbait. Izen propio horiek ere laguntzen baitute Zinemaldiko programazioa osatzen duten pelikulen garrantzia eta dimentsioa erakusten eta, beraz, edizio bakoitzean espero dezakegunaren berri ematen digute. Aurtengoari dagokionez, esan dezakegu gaur egungo zinema panoramako zinemagilerik nagusienak izan direla bertan beren lanak aurkezten eta ez soilik atal ofizialean. Jacques Audiard, Alfonso Cuarón, Claire Denis , Bruno Dumont, Louis Garrel, Lucile Hadzihalilovic, Mamoru Hosoda, Kim Jee-Woon, Naomi Kawase, Brillante Mendoza, Nadine Labaki, Peter Strickland eta Felix Van Groeningen izan dira, besteak beste, aurtengo edizio honetan Donostiara etorri direnak.
